CELEBRASUN 12 NOVEMBRO

ESTUDANTES TIMOR OAN SELEBRA LORON 12 NOVEMBRO

KOMUNIDADE ESTUDANTES ASEMPAYUNG-SURABAYA

Estudantes Timor oan sira nebe mak hamutuk iha komunidade Asempayung (Surabaya-Indonesia), selebra loron 12 Novembro hodi hanoin hikas fali akontesementu nebe mak mosu hasoru jovens no estudantes sira Timor oan iha tinan 17 liu ba. Selebrasaun halo ho simples tuir kondisaun nebe mak estudantes sira hetan. Aktividades hodi hanoin hikas fali tragedia ne’e komesa iha tuku 10.00 kalan oras Surabaya, nebe mak komesa depois de estudantes sira halo hotu sira nia ijame (midle semester). Aktividades ne’e hatudu katak, gerasaun foun Timor oan sei la haluha sofremento nebe mak sira nia maun, aman, tiun, no belun sira ofrese ona hodi lori Timor ba ukun rasik an.
Orario komesa ho reza terso hodi hanoin matebian sira Timor nian nebe oferese ona sira isin no vida hodi objetivo Timor ukun rasik an. Depois de reza terso, kontinua fali ho halo ijame de konsensia. Iha ne’e, estudantes sira hanoin sofre no terus nebe mak povu Timor hetan, komesa husi tempo luta nian to’o iha tempo ukun rasik an. Estudantes idak-idak ho sira nia konsensia tau signifika 12 Novembro ba sira nia an rasik, hodi halo promesa ba idak-idak nia an atu kontinua nafatin luta nebe mak heroi, militantes, no povu tomak iha Timor kuda hela tiha ona. Luta kontinua la’os katak atu kaer fali kilat hodi duni inimigo ou oho falu malu. Maibe nudar estudantes, luta nebe mak estudante hotu sei halo katak luta atu lori povu Timor sai husi kiak, sofre, mate hamlaha, ba Timor nebe mak moris iha dame, paz, no hakmatek nia laran, atu nune’e mundo sei la hare tan nasaun ne’e ho matan ikun. Depois de ijame de konsensia hotu, komunidade kontinua fali ho han hamutuk. Estudantes idak-idak lori nia hahan, hafoin tau hamutuk hodi hamutuk. Han hamutuk ne’e akompanha ho hare filme 12 Novembro 1991. Programa ne’e remata iha tuku 11.30 kalan oras Surabaya.
Valor nebe mak hetan husi aktividades ne katak, gerasaun foun Timor, liu-liu estudantes Timor oan tomak, sempre fo apoio (recognize) nafatin ba luta nain sira Timor nian. Responsabilidade etudantes tomak Timor oan nia iha tempo agora ba oin mak lori povu Timor tomak sai husi kiak, mate hamlaha, tanis, no ran nakfakar. Maske servisu ida karik todan tebes, maibe ho esperito aten brani (tuir knar nudar ema intelektual), neneik maibe los Timor sei hamrik hanesan ho nasaun seluk iha mundo ne. Ita hotu espera katak buat hirak ne'e sei laos mehi deit, maibe sei sai realidade. Atu buat sira ne hotu bele realija, unidade tenke hametin nafatin. Importante, idak-idak sei halo tuir nia knar nudar ema Timor. Estudantes sira nia knar mak estuda makas, hakonu sira nia kakutak ho science tuir idak-idak nia disiplina. nain ulun (estadu) sira knar kria kondisaun nebe diak, loke serviso ba povu, i importante nain ulun sira sei la buka tan atu hatun malu. TJ.C