Remata Duni

Viagem naruk nudar estudante iha Surabaya to’o duni iha nia fin. Remata tiha hau nia S-1 iha tinan fin 2006 no S-2 iha 2009. Tinan naruk tebes mak liu tiha ona, iha nebe dala ruma hau hakat liu sein hetan valor buat ida. Maibe ikus mai buat nebe mak hau buka nudar mehi nebe mak durante tinan ba tinan hau duni, ikus mai hau hetan duni. Tinan barak mak hau hakat liu, hamutuk ho hau nia ksolok no susar nudar estudante iha tasi balun. Hau haksolok tanba hau bele remata duni hau estudo, maske ho tempu nebe mak la tuir hau nia hakarak. Wainhira 1997 hau mai iha Surabaya, hau iha mehi ida katak, hau sei remata hau nia estudo S-1 iha tinan nebe mak lais. Tuir plano nebe iha, hau bele remata hau estudo iha 2001. Maibe hakarak nebe mak hau iha, la tuir relaidade nebe mak hau hasoru. Iha tinan 1999, wainhira iha referendum iha Timor, estudantes tomak nebe iha Indonesia, inklui mos hau fila ba Timor atu tuir votasaun ba ukun rasik an. Desijaun politika hatudu katak 80% povu Timor hili atu haketak an husi Indonesia. Maibe la’os tanba ida ne mak hau tarde atu remata hau nia estudo. Hau tarde remata hau nia estudo tanba plano nebe mak sala. Sala tanba hau hili departamentu nebe la tuir hau nia kapasidade nudar estudante (hau hili Architecture). Entaun, wainhira 2001 hau fila fali mai Surabaya atu kontinua hau nia estudo, hau foti desijaun ida atu muda departamentu. I departamentu nebe hau hili mak Teknik Industri. Hau komesa fali hau nia estudo iha marcho 2002 iha UniKa Darma Cendika. Iha ne’e, neineik maibe los hau remata duni hau nia estudo iha fin de 2006, maske ho resultado nebe mak bain-bain deit. Hau kontenti, familia sira mos haksolok. Sira hatudu sira nia ksolok hodi mai tuir hau nia graduasaun. Depois de remata hau S-1, ho suporta nebe mak familia fo, hau kontinua hau estudo ba S-2 iha UniKa Widya Mandala Surabaya. Grasa wain ba Aman Maromak, nebe fo ona espirito matenek no saude nebe mak diak hodi hau bele remata hau estudo S-2 ho diak.

Hau remata ona hau estudo, agora ba oin, iha responsabilidade nebe mak bo’ot liu tan. Responsabilidade ne’e mak oin sa hau bele aplika buat nebe mak estuda ona ba iha kampu servisu. Hanoin ba resposabilidade bot ida ne’e, hau senti laran taridu oituan, maske hau mos fiar an katak teoria nebe mak durante ne estuda metin duni iha hau nia kakutak. Maibe hau mos hatene, teoria nebe mak hau estuda ona sei la uja 100% wainhira hau tama iha kampo serviso. Iha ne’e presija tebes hau nia kreatividades. Hau iha mehi ida wainhira hau besik atu remata hau nia estudo. Mehi ne mak hau hakarak atu hanorin deit iha universidade (sai dosen). Iha nebe, hau bele tempu barak atu bele hala’o mos aktividades sira seluk, hanesan kaer projeto ida. Projeto nebe hau rasik mak ukun iha laran. Ida mehi ida, i agora dadaun hau mos perpara hela an wainhira buat sira mosu mai hasoru hau. Hau espera katak, buat nebe mak oras ne dadaun iha hau nia hanoin, bele realija duni. Maibe hau hatene, atu hetan buat sira hotu la’os buat nebe mak fasil. Presija esforsu nebe mak maka’as tebes. Iha kampo nebe bot liu, sempre iha obstacle no desafio barak mak sei mosu hasoru. Mehi nebe iha, bele sai realidade duni, wainhira ita servisu maka’as atu relija duni mehi ne’e.

Agora ne’e tempu-tempu ikus nian hau iha Surabaya. Hau sempre iha mehi ida katak loron ida hau sei mai fali iha rai ida ne’e hodi kontinua hau nia estudo. Iha fin de fulan ida ne’e hau sei fila ba Timor, tama fali ba realidade moris ida nebe mak iha responsabilidade bo’ot liu. Responsabilidade atu aprova katak hau mak ne’e, i hau prontu atu hala’o servisu sa ida deit mak iha relasaun ho buat nebe mak hau estuda ona. Tanba hau fiar katak hau iha duni kapasidade atu hala’o servisu hirak ne’e. Tempu to’o ona mai hau atu hanoin fali buat nebe mak buat liu tan hodi responsavel ba buat nebe hau hetan ona. Tempu to’o ona mai hau atu hatudu ba familia tomak, liu-liu hau Pai no Mae katak suporta finansia, material, no orasaun nebe mak sira fo ona durante tinan barak ne’e sei la saugate.